Lr aloe vera Ubb kayit
Örnek Resim
SON DAKİKA

Anasayfa > ETKİNLİKLER > ZİNİ GEDİĞİ ANMASINDA PLATFORMUMUZ ADINA YAPILAN KONUŞMA…

ZİNİ GEDİĞİ ANMASINDA PLATFORMUMUZ ADINA YAPILAN KONUŞMA…

Qedırberzi, hevali,

Ez azawo “platformê xo vir ardena 37 u 38i”ver ra wazen ke zonê dayıka xo ra dı asê cumlawu vajine. Jenosidê Dêrsim 37-38i de duwele waşto ke hem kamiya ma, hem zonê ma hem ki itiqatê ma wertê ra wedardayo.

“Medeniyetê ju qomi ke çin o tarixê inu tari yo”, deyın ju qese esto. Duwelê xezevtulawu no zonıto ke duwela Selçuki ra hata 1937-38i(hazar u new sey u hiris u howt-hirıs u heşt) Dêrsim sere deva-deve 11(des u ju) rey hêriş kerdo. Duwelu nê tertelewu ra waşto ke rengarengêna Dêrsimi hem hetê qomu ra, hem ki hetê itiqatu ra wedaro. Sairê ma wo pil Sey Qaji ra gorê; duweli vuriyê, hama tali u tecelê ma qe nêvuriyo. Sey Qaji vatêna xo de:“Dewrê Tazminati/Dewrê hurati/Dewrê Cumrati/Pêro ki mı di/ Bara ma rê bi tertele u afati”, vato ke duştê duwelu de halê ma areze kerdo.

 

Zini Gediği Konuşmam 2014

Na qırrımi ça ardê sarê ma ser? Çı ke inu ra gorê; ma nê qomê xo ra, nê zonê xo ra, nê ki itiqatê xo ra laqê tırkên-mıslımanên nêbiyime. Dêrsim duwele ra gorê; “wertê Tırkiya de ju rem”, biyo. Gereke ney bıvırnê ke pak bo. Na sevev ra  İsmet İnonu ,1935ine de Qanunê Tunç-eli vıraşto, na qanun ra namê Dêrsimi vurno. Dıma qomutanê pili rusnê Dêrsimi ser. Duwele her ca ra leşker rusnê, qereqol vıraştê. Waxt ke amo eve teyyaru, eve topu, eve tıfongu, sarê ma qırr kerdo. Ewro ma zonême ke jênosid de deva-deve 70.000 (howtay hazar) isoni kişê. Hama iyê ke peyde mendê ya ki iyê ke xeleşiyê duwele waşto ke ê ki kamiya xo ra u raa heqıye ra bıqırfiyê.

İsmet Pasa 1935 de “Rapolê Rojakewteni” de Erzıngan de cawo ke deweyê elewi-kırmanc estê, ucawu ra vato; “İta Dêrsimo qız o.” Waxtê jênosidê Dêrsimi de her cayê Dêrsimi ki bara xo gureta. Na barê ra sarê Erzıngani ki morım nêverdê. Jênosidê Dêrsimi de duwele pil ve qız ra 51 ju ca de qırrımi vıraştê. Na qırrımu ra ju ki 96 serra raver 97 bêguna isoni 6 asma amnona peyêne de, wertê Erzıngani u Dêrsimi de,  mıntıqa Gavanê Zini de qırrkerdê.

Sarê Kırmancu çêwu ra, hegawu ra, karê xo ra dêare, bêpers u bêcav ardê ita. Wertê nê masumê paku de 90 serre de kokım ki biyê , hona 16 serre de xorti ki biyê.Dıma, pêro sanıtê verê qerqesunu. Mıleto ke qırrkerdê, inu rê ju mezele bilê jêde vênıta. Vato; “tayr-tur rê, vergu rê werd bê.” Nêverdo ke pêra ra iyê ke peyde mendê, ê meyitunê xo wedarê.

İyê ke nêkıştê ê ki arê kerdê, cawurnê, rusnê  sukunê  Tırkiya. Cawo ke rusnayê uca ki mıleti cı rê xêr nêkerdo  vato; “Nê ison wenê, ninu ra dur vindime”. İyê ke pıskıtê Tırkiya, ênu ki her roj heqê xo ra, merdena xo waşta.

Çı hêfo ke sere biya 2014, hama duwele hona tarixê xo de têriyên nêkena. Dewlete hona na qırrımu suc sa nêkena. Kometunê ma rê bila tabat nêkena, rıznena. Hama na dawa, êndi  dawa isoniyên a. Omıd ken ke “Mehkemewo Heqanê İsonêni ya Ewropa” de na heqe cêrina. Omıdê ma nawo ke reyna Qırrrımê Gavanê Zini mebê. Hama gereke ma ki kamiya xo rê u itiqatê xo rê wayirên bıkerime, reça piriku u kalıkunê xo ra meqırfime. Nara tepiya gereke weşiya u itiqatê xo zonê dayıka xo ra bıramime. Zonê tırki çê xora bıvejime ke iyê ke canê xo ra biyê astıkê inu ki mesuzê. Qesunê xo, qesunê Sey Qaji ra bıqedêni.  ““Vas koka xo ser reweno/Tayr zonê xo ra waneno/Kamo Aslê xo yınkar keno/Toz erzeno reça xo sono.”

Daimi DOĞAN

Bir Cevap Yazın

Yorum yapabilmek için giriş yapmalısınız.

Bu Haberler Dikkatinizi Çekebilir

Portalımız açık kaynak özgür yazılım araçları kullanılarak hazırlanmıştır.CopyLEFT | 2014 | Dersim 37-38 | Ortak Bellek Platformu
İLETİŞİM: Konur Sokak No:24/17 Kızılay/ANKARA Telefon : 0 312 435 6221 E-Posta: ortakbelleklplatformu@gmail.com www.dersim37-38.org